جاري تحميل ... مكسبي سبورت

إعلان الرئيسية

إعلان في أعلي التدوينة

مقالات

عمرك سمعت عن نادي إتأسس وفكره إنشائه قايمة علي محاولة إسقاط ومُكايدة نادي آخر ؟

 

كتب: محمد حلاوة

عمرك سمعت عن نادي إتأسس وفكره إنشائه  قايمة علي محاولة إسقاط ومُكايدة نادي آخر ؟

* تعالوا نحكي الحدوتة من الأول خالص 

كان فيه شخص مريض بـ داء الشهرة والبحث عن الأضواء والسيطرة علي ذمم الناس وضمايرهم شيطانه صورله إنه ممكن يتحكم فـ كيان عظيم إتأسس من ١١٤ سنه إسمه الأهلي، وكان فاكر إنه يقدر يتدخل فـ قرارات النادي السيادية وياخد اللقطة والشو علي حسابنا لـ مجرد إنه معاه حفنة من المال.


صحيح معاه فلوس ملهاش أول من آخر لكن محدش يسمع عنه ولا يعرفه فـ يعمل إيه عشان يكون محط أنظار الجميع ؟


يسعي إنه يتشرف إن إسمه يرتبط بـ إسم منظومة عريقة زي الأهلي اللي بيسيط أي حد يعدي بس من جمبه وفـ يوم وليلة بعد ماكان نكرة أصبح هو حديث الصباح والمساء فـ الصحافة والإعلام لـ مُجرد إنه إرتبط بـ الأهلي.


صحي صاحبنا من النوم فجأة لقي نفسه بره الكيان وقتها جن جنونه وقال إزاي قدروا يستغنوا عن كل المكاسب اللي أقدر أوفرهلهم فـ سبيل الحفاظ علي شوية مبادئ وقيم وثوابت اللي زيه ميعرفش قيمتها.


مكنش قدامه غير إنه ينتقم ويعمل أي لقطة لحفظ ماء الوجه وعشان يوقع الكيان ويحاول يهز إستقراره ويصدرله الأزمات لكن _ هيهات _ .!


راح إشتري نادي بـ ملايين ملهاش عدد وإتعاقد مع كل اللعيبه اللي كان عايزهم الأهلي وكنا كل دقيقة نسمع عن لاعب جديد وصفقة مُدوية وفـ ظرف أيام بقي فيه قوام فريق الكل بيقول إنه هيبقي خطر رهيب علي كل فرق الدوري.


مش كده وبس لا ده كان فاكر إنه لما يستقطب حسام البدري وأحمد أيوب وهادي خشبة وغيرهم يبقي هو كده يقدر ينقل شخصية الأهلي والـ System اللي بتُدار بيه المنظومة أصله غبي ميعرفش إن النجاح مش بـ الأشخاص ده بعظمة وقوة وشخصية وتاريخ الكيان.


المهم صاحبنا ده بقي إشتري بفلوسه أقلام وضمائر صحفيين وأصوات مذيعين وحيادية محللين وذمم إعلاميين مش بس كده لا ده كمان إشتري مُشجعين وعمل أغنية لفريقة العتيد !.


وقالك الكل يوسع عشان إحنا جايين بروح " الفانلة الزرقا " ⁦وعمل بيدچ كانت بتتكلم عن الأهلي أكتر ما بتتكلم عن فرقته وعمل قناة وجاب فيها كل اللي بيكرهوا الأهلي وإعلانات كل ثانية وملايين ملهاش أول من أخر إتصرفت علي شراء النادي والتعاقدات والقناة والمرتبات وإلخ إلخ..


فجأة حضر الأسطورة رونالدينهو عشان مدحت شلبي يخليه يقول "  أفشة " 😀 ونجوم عالميين شوفناهم بيحللوا أداء أحمد أيمن منصور وعمر جابر وعلي جبر وناصر منسي .! .


وفـ يوم صحينا علي خبر عاجل : الحارس البرازيلي العظيم Dida جاي عشان يدرب الشناوي  Eror 404 & واللي يقول جايين عشان ناخد الدوري واللي يقول المنافسة محصورة بينا وبين الزمالك واللي يقول ياسلام دي تجربة إستثمارية عظيمة وطفرة فـ الدوري المصري .


ومع كل إخفاق أو تعثر للأهلي كان بيخرج علينا وزير الترفية بشوية تغريدات عليtwitter كلها شماتة وتلقيح وتطاول علي رئيس وأعضاء مجلس إدارة النادي بهدف إحداث فتنة بين الإدارة والجمهور مش كده وبس لا ده كمان هو اللي حرض شركة SELA وشركة Sporta علي إنهم يفسخوا تعاقدهم مع الأهلي .


ولـ إن الأهلي ( لحمه مُر ) حس إنه مش هيقدر عليه لوحده وعشان كده هو محتاج حد يساعده ويكون كاره أوي للأهلي ومغلول منه وعنده رغبه قوية فـ الإنتقام ويكون الأهلي عقده حياته ومهما دور مش هيلاقي أفضل من " كومبارس الأمة ".


وهنا بقي بدء التحالف القذر والرخيص ضد الأهلي ولأول مرة فـ التاريخ نشوف مالك نادي فريقه بيلعب فـ مسابقة بيدعم فريق منافس ليه فـ نفس المسابقة .! زي ماتقول كده " زيتنا فـ دقيقنا " أديك لعيبه وتديني لعيبة أجيبلك مدير فني ولعيبة وأدفعلك مرتباتهم وأعملك معسكر خارجي وأجيبلك لبس للفرق الرياضية وأخلي الفريق يسافر بطيارة خاصة حاجة كده زي ماتقول نفع وإستنفع أهم حاجة إن الأهلي مياخدش الدوري ومتقوملوش قومة تاني بس علي مين نجوم السماء أقربلك ..


وفجأة صاحبنا بـ يعلن إنسحابه من المشهد وإنه هيصفي كل أعماله ومشاريعة الجهنمية ويعلن إنتهاء التجربة الإستثمارية العظيمة وإنه هيببع نادي " المُرتزقة " لكن وفـ واحد من أهم المشاهد الدرامية فـ تاريخ مصر بنلاقي اللعيبة بتصور ڤيديو بعنوان (( متسيبناش يامعالي المستشار ))


ونزولاً لـ رغبه الجماهير العريضة يتراجع وزير الترفيه عن موقفه ويقرر الإستمرار بقوة عشان يتغلب علي الوحشين اللي كانوا عايزين الفشل لأعظم تجربة إستثمارية فـ تاريخ الرياضة المصرية .!  الفترة دي شوفنا فيها إنسحابات أكتر من بطولات الزمالك 😁


بدء الأهلي يتعثر والنتائج من سئ لـ أسوء ومع كل إخفاق أو نتيجة سلبية كانوا بيفتكروا مخططهم نجح وإنهم هيقدروا يخلصوا علي البطل وبدأنا نسمع تصريحات وعبارات عنترية من المسؤولين والجماهير والمحللين والنُقاد كلها تهكُم وتريقة وسُخرية وإستهزاء غريب وغير مُبرر علي نادي واخد الدوري عقد إحتكار .!  أَيْنَ أَنْتِ يَا حُمْرَةَ الخَجَل.


فـ الظهور الأول لـ بيراميدز فـ الدوري حقق المركز التالت بعد ماجمع 70 نقطة بفارق 10 نقط عن الأهلي البطل ومنجحش إنه يكسب كأس مصر ولا فـ إنه يتأهل لـ دوري أبطال أفريقيا.


وفـ الظهور التاني حب الموضوع وبرضه حقق المركز التالت بعد ماجمع 65 نقطة والمرادي بـ فارق 24 نقطة عن الأهلي البطل ک العادة وبرضه منجحش إنه يفوز بكأس مصر ولا إنه يتأهل لـ دوري أبطال أفريقيا لكنه لعب الكونفيدرالية بصفته تالت الدوري الموسم اللي قبله ووصل للنهائي وخسر .


وفـ الظهور التالت بقي بيراميدز قرر يقدملنا وجبة دسمة من  الضحك خام عشان يلعب فـ الدوري إلي آلان 17 ماتش كسب 6 وإتعادل 9 وخسر 2 جمع 27 نقطة من 51 يعني خسر 24 نقطة أحرز 23 هدف وإستقبل 17 وبيحتل المركز الخامس.


فـ الحقيقة أنا معنديش مشكلة شخصية مع بيراميدز وبرضه معنديش سبب يخليني أشمت فيهم أو إني أفرح بخسارتهم أو أزعل علي مكسبهم، إذا كنت أنا ک أهلاوي مبعملش كده مع فرقة مثلاً زي الزمالك اللي هي المفروض إنها بعد الأهلي فـ كل شيء سواء بطولات أو أرقام أو شعبية يبقي هل معقول هشغل بالي بفرقة حديثة العهد إتعملت بـ هدف " مُكايدة " الأهلي .


أنا بس كل اللي مُهتم بيه واللي شاغلني الإسطوانة المشروخة واللطميات والكربلائيات والمظلوميات اللي كانت بتتردد عن إن الأهلي هو السبب فـ إفساد الحياة الرياضية فـ مصر وهو اللي فرغ الأندية من لعيبتها المُميزة ورفع سقف التعاقدات وإحتكر الـ Mercato بإنه تعاقد مع لعيبة كتير وصرف عليهم ملايين علي الرغم إنه بـ اللعيبة دي كان بيحقق بطولات .! 


طب تقول إيه بقي فـ اللي عمل أكتر من اللي عمله الأهلي و فـ 3 سنين بس ومحققش أي حاجة ولا كسب بطولة واحدة، بيراميدز من موسم 2018 / 2019 تعاقد مع كلاً من : 

اللاعبين الأجانب 👇

كينو                                             8.60 مليون يورو 

كريستيان بينافينتي                        6 مليون يورو 

رودريجينيو                                   6 مليون يورو

كارلوس إدواردو                             2.5 مليون يورو 

لوكاس ريبامار                                4 مليون يورو 

چون سيفوينتس                            4.35 مليون يورو 

آرثر شابيكوينسي                           2.20 مليون يورو 

إيريك تراوري                                2 ونص مليون يورو 

أزوبيكي أوكيتشوكو                       مليون ونص يورو

چون أنطوي                                  950 ألف يورو 

عمر لعيوني                                   مليون ونص يورو 

ولفريد كانون                                 مليون يورو 

عبده لومالا                                   100 ألف يورو

اللاعبين المصريين 👇

رمضان صبحي                             4.85 مليون إسترليني 

أحمد الشناوي                               60 مليون جنية 

علي جبر                                      45 مليون جنية

عبد الله بكري                               45 مليون جنية 

عمر جابر                                     36 مليون جنية 

عبد الله السعيد                            36 مليون جنية 

إسلام عيسي                                35 مليون جنية 

محمد فتحي                                30 مليون جنية 

محمد مجدي قفشة                       28 مليون جنية 

محمد حمدي                                27 مليون جنية 

المهدي سليمان                              25 مليون جنية 

ناصر منسي                                  18 مليون جنية 

محمد فاروق                                18 مليون جنية 

أسامة جلال                                 18 مليون جنية 

رجب بكار                                    18 مليون جنية 

إبراهيم حسن                               16 مليون جنية 

أحمد توفيق                                 15 مليون جنية 

طارق طه                                    15 مليون جنية                            

عمرو مرعي                                مليون و ٣٥٠ الف دولار 

أحمد أيمن منصور                         12 مليون جنية                                                   

أحمد خالد                                  6 ونص مليون جنية

محمود حمادة                             4 مليون جنية 

محمد عطوة                               3 مليون جنية 

أحمد علي                                  500 ألف جنية  


ده طبعاً غير المرتبات الضخمة جدا اللي إتصرفت علي عدد كبير من اللعيبة اللي لم يتم الإعلان عن قيمة صفقاتهم وعدد أكبر من اللعيبة اللي راحت Free + المبالغ الطائلة والخيالية اللي إتصرفت علي 7 أجهزة فنية مختلفة تولوا تدريب الفريق فـ خلال 3 سنين إبتداء من ألبرتو فالنتيم وريكاردوا لافولبي مروراً بـ حسام حسن ورامون دياز وسبستيان ديسابر وأنتي تشاتشيتش وأخيراً أروا بارينا.


المُضحك هنا بقي إن اللعيبة دي فيه منهم اللي لعب 6 شهور واللي لعب شهرين واللي لعب شهر واللي لعب 3 أو 4 ماتشات واللي لعب كام دقيقة واللي ملعبش خالص .!


الآلة الجميلة بقي وإحسبلنا كده الارقام دي تطلع كام 🤔 وياريت وإنت بتحسب تكون فاكر إن كل اللعيبة  دي تم التعاقد معاهم خلال 3 سنين فقط .! وبعد كل الأرقام دي المُحصلة = صـــــفر بصوت محمد هنيدي


بيراميدز لم يفوز بـ الدوري فـ أي موسم 

بيراميدز لم يفوز بـ كأس مصر فـ أي موسم 

بيراميدز لم يتأهل لـ دوري الأبطال فـ أي موسم 

بيراميدز لم يفوز بـ الكونفيدرالية فـ أي موسم 


هل فيه دكر فـ الإعلام المصري من اللي كانوا بيصدعونا إن تجربة بيراميدز تجربة إستثمارية عظيمة هتنقل الرياضة المصرية فـ حتة تانية يقدر يقول إن التجربة فشلت فشل ذريع ؟


هل فيه دكر يقدر يقول إن بيراميدز ده إتأسس بهدف الإنتقام من الأهلي ومحاولة إسقاطه وزعزعة إستقراره، هل فيه دكر يقدر يقول إن الحوار كله كان غسيل أموال، هل فيه دكر يقدر يقول إن بيراميدز أفسد الحياة الرياضية، وضخ أموال طائلة وفـ النهاية مقدرش إنه يفوز بـ أي بطولة ولا يحقق أي نجاحات تُذكر مقارنة بـ حجم المصروفات اللي صرفها .


هل فيه دكر يقدر يقول إن بيراميدز فرغ الأندية من لعيبتها، هل فيه دكر يقدر يقول راحت فين المبالغ الخيالية اللي وصلت لأكتر من 2 مليار جنية اللي إتصرفت علي نادي أقصي إنجاز عمله تحقيق المركز التالت في الدوري اللي هو أي نادي فـ نص الجدول بيحققه عادي .! 

وفـ النهاية وعلي الرغم من كل ده إحنا بنشكر صاحبنا ده عشان اللي عمله ده كشفلنا مين معانا ومين علينا ومين اللي عنده إستعداد يبيع تاريخه وإسمه وبيته عشان حفنة رخيصة من المال .!

الوسوم:

ليست هناك تعليقات:

إرسال تعليق

إعلان في أسفل التدوينة

إتصل بنا

نموذج الاتصال

الاسم

بريد إلكتروني *

رسالة *

موقع مكسبي سبورت يقدم احدث الاخبار الحصرية الخاصة بكل مجالات الرياضة في كافة انحاء العالم وخصوصا مصر بما فيها من احداث رياضية كروية ، كما نهتم بتقديم كافة الاخبار العالمية في جميع البطولات الهامة والتي تتمثل في بطولة كاس العالم واهم الدوريات الاوروبية mksabytv.com